बुधबार, २६ मङ्सिर, २०७५ Wednesday, 12 December, 2018

त्यो देश भन्दा यो देश राम्रो भन्ने देखाउन चाहाने लेखक भण्डारी 

करिब डेढ दशकयता पत्रकारिता क्षेत्रमा क्रियाशिल रोहित भण्डारी पछिल्लो समय प्रेरणादायी पुस्तक लेखकका रुपमा चिनिन्छन् ।

रिव डेढ दशकयता पत्रकारिता क्षेत्रमा क्रियाशिल रोहित भण्डारी पछिल्लो समय प्रेरणादायी पुस्तक लेखकका रुपमा चिनिन्छन् । पत्रकार भण्डारीको ‘सम्भव छ’ र ‘नेपालमै सकिन्छ’ नामक दुई पुस्तक यतिबेला चर्चामा छन् ।

Rohit-Bhandari-writer

यी पुस्तकका लागि नेपाल सरकारले पत्रकार भण्डारीलाई नगद एक लाख रुपैंयाँ राशीसहितको राष्ट्रिय युवा प्रतिभा सम्मान–२०७४ बाट समेत सम्मानित गरिसकेको छ । यतिबेला उनी तेस्रो पुस्तकको तयारीमा छन् । प्रस्तुत छ पुस्तककै सेरोफेरोमा केन्द्रित रहेर पत्रकार भण्डारीसँग सुम्निमा काफ्लेले गरेको कुराकानी :

  

तपाईँले पुस्तक लेखेरै नेपाल सरकारबाट राष्ट्रियस्तरको सम्मान पाउनुभयो । कस्तो महसुस भयो ?

असाध्यै खुसी भएँ । यो सम्मान जसलाई मैले म प्रतिको सम्मानका रुपमा मात्र नलिई पुस्तकमा समावेश सबै पात्र प्रतिको सम्मानका रुपमा लिएँ । सम्मानित भइरहँदा ‘सम्भव छ’ अभियानका व्यवस्थापक डिल्ली तुलाधरसहित ती पात्रहरुलाई सम्झिएँ । जसका संघर्ष र सफलताका कथा पुस्तकमा लेखेको छु ।

प्रेरणादायी व्यक्तिहरुका विषयमा लेखिएका पुस्तकका कारण सम्मानित हुन पाउँदा मलाई थप प्रेरणा मिलेको छ । हौसला मिलेको छ ।  लागेको छ, यस्ता पात्रहरु अझै खोज्नुपर्छ र उहाँहरुका विषयमा लेख्नुपर्छ । 

 

पुस्तकले यो स्तरको सम्मान दिलाउला भनेर कहिल्यै सोच्नु भएको थियो  ?

थिइन । किनकि कुनै सम्मान र पुरस्कारको आशले मैले पुस्तक लेखेकै थिइन । म अरुको सम्मान गर्न चाहन्थेँ । कर्मवीरहरुको सम्मान । समाजमा सानातिना भनिने काम गरेर उदाहरणीय बनेका व्यक्तिहरुलाई पुस्तकमा राख्नु, उहाँँहरुका विषयमा लेख्नु उहाँहरु प्रतिको मेरो सम्मान भाव थियो । राष्ट्रपतिज्यूका हातबाट जब मैले राष्ट्रिय युवा प्रतिभा सम्मान पाएँ त्यसपछि लाग्यो— अरुको सम्मान गर्न जानियो भने आफ्नो सम्मान स्वतः हुने रहेछ ।

 

पत्रकारिता क्षेत्रमा रहँदा–रहँदै तपाईँले दुईवटा पुस्तक लेख्नुभयो । कसरी सम्भव भयो त्यो ?

म पत्रकारिता क्षेत्रमा थिइन भने पुस्तक लेखनको यो यात्रामा पनि हुने थिइन होला । पत्रकारिताकै दौरानमा मैले समाज पढ्ने र बुझ्ने अवसर पाएँ । वैदेशिक रोजगारीको डरलाग्दो तथ्यांकबारे यही क्रममा जानकार भएँ । 

पछिल्लो एक दशकको अवधीमा झण्डै २५ लाख नेपाली युवा वैदेशिक रोजगारीमा गएको तथ्यांकले मेरो मन असाध्यै घोच्यो । यत्तिका युवा किन देश छाडेर गए त ? मलाई लाग्यो, ती युवाले देश छोड्नुमा सरकार र तीनका निकायहरुको दोष जति छ हामी पत्रकारको दोष पनि त्यत्तिकै छ ।

समाजमा केही राम्रो काम गरेका, प्रतिकुल राजनीतिक सामाजिक अवस्थाका बीचमा पनि लोभ लाग्दो प्रगति गरेका मेहनती युवाहरुका समाचार र विचार हामीले हाम्रा सञ्चार माध्यमहरुमा प्रस्तुत गर्न सकेको भएपक्कै ती युवामा थोरै भए पनि आशाको किरण जाग्थ्यो । तर, हामीले त्यस्तो गरेनौं । बरु, यो छैन, त्यो छैन, यो भएन, त्यो भएन भन्ने नकारात्मक समाचार र विचार मात्र प्रस्तुत गर्‍यौं ।

त्यसैले, मैले सोचेँ, अब म त्यो भन्दा फरक धारबाट अघि बढ्छु । समाजमा केही गरेका, थोरै लगानीमा पनि राम्रो आम्दानी गर्न सफल भएका व्यक्तिहरुलाई उदाहरणका रुपमा प्रस्तुत गर्छु, जसले नेपाली युवाहरुमा गरे हुने रहेछ भन्ने साकारात्मक भावना र आत्मविश्वास जागृत गराओस् । 

 पुस्तक प्रकाशन भएपछिका केही सम्झन लायक क्षणहरु सुनाउनुस् न ?

त्यस्ता धेरै क्षणहरु छन् । पाठक प्रतिकृया मैले सोचे भन्दा धेरै आयो । थुप्रै फोन, म्यासेज आए, थुप्रै इमेल आए अनि कति पाठकहरु जो टाढा टाढादेखि प्रत्यक्ष भेट्नकै लागि म कहाँ आउनुभयो । अर्को कुरा मैले जो–जो पात्रहरुका विषयमा लेखेँ उहाँहरु सञ्चारमाध्यममा राम्रैसँग छाउनुभयो । 

 

पुस्तक के का लागि लेख्नुहुन्छ ? ब्यापार, सन्तुष्टि वा अन्य कारणहरु पनि छन् ?

व्यापार र सन्तुष्टी भन्दापनि नेपालमै केही गरौं, गर्नुपर्छ र गर्न सकिन्छ भन्ने सन्देश प्रवाहका लागि लेख्छु । उन्नति र प्रगतिका लागि यो देशभन्दा त्यो देश राम्रो भन्नेहरु प्रशस्तै छन् । तर, म त्यो देश भन्दा यो देश राम्रो भन्ने देखाउँन चाहन्छु । 

 

प्रायः कुन समयमा लेख्नुहुन्छ ?

समय त ठ्याक्कै यही भन्ने छैन । फुर्सद मिलेपछि लेख्न बस्छु ।

 

अन्य लेखकका पुस्तकहरु चाहिँ कत्तिको पढ्नुहुन्छ ?

धेरै पढ्ने पनि होइन, पढ्दै नपढ्ने पनि होइन । ठिकै पढ्छु । तर, धेरै चाहिँ म समाज पढ्न रुचाउँछु । समाजका त्यस्ता पात्रहरु जसका विषयमा लेखिएका छैनन् । जसका विषयमा बोलिएका छैनन् । तीपात्रहरु मेरो रोजाईमा पर्छन् । जोसँगको प्रत्यक्ष भेट र संवाद साँच्चै प्रेरणादायी लाग्छन् ।  

 

तेस्रो पुस्तक लेख्ने सोच बनाउनु भएको त छैन ?

बनाएको छु । अहिले म तेस्रो पुस्तकको तयारीमा नै व्यस्त छु । पात्रहरु भेट्ने र लेख्ने काम गरिरहेको छु । 

 

कस्तो हुनेछ तपाईंको तेस्रो पुस्तक ?

यही समाजका प्रेरणादायी पात्रहरुकै सन्दर्भमा केन्द्रित छ । तर, अघिल्ला दुई पुस्तकभन्दा फरक प्रकारको छ । लेखनको धार प्रेरणादायी नै हो । तर, लेखनको विषयवस्तु र क्षेत्र फरक छ । 

 

प्रेरणादायी पुस्तक लेखनलाई अभियानकै रुपमा लैजाने सोच हो तपाईँको ?

हो । ‘सम्भव छ’ र ‘नेपालमै सकिन्छ’ अब सामान्य पुस्तकमात्रै होइन । तपाईले भने जस्तै यो एउटा अभियान हो । त्यही अभियानको निरन्तरता हो अबको पुस्तक पनि ।

 

तपाईँको पहिलो र दोस्रो पुस्तक जसले पढ्नुभएको छैन, उहाँहरुलाई भन्दिनोस् न कस्ता कस्ता पुस्तक हुन् यी ?

कमजोर आर्थिक पृष्ठभूमीबाट माथि उठेका २३ जना संघर्षशील पात्रहरुको संघर्ष र सफलताको कथा हो – ‘सम्भव छ’ । जसका कथाले आर्थिक प्रगति र उन्नति मेरो हकमा पनि सम्भव छ भन्ने आत्मविश्वास जगाउँन मद्दत पु¥याउँछ ।

अनि नेपालमा केही हुँदैन, केही गर्न सकिदैन भन्ने निराशाका बीचमा नेपालमा के–के गर्न सकिन्छ ? भन्ने केही टिप्ससहित केही प्रेरक व्यक्ति र प्रेरक सन्दर्भ समेटेर लेखिएको पुस्तक हो– ‘नेपालमै सकिन्छ’ ।
 

प्राप्त प्रतिकृयाहरू
राजेन्द्र वाग्ले लेख्नुहुन्छ २०७५ कार्तिक २९ बिहीबार ५:५६ pm

राम्रो छ / र अबसर को खोजी आफै बाट गर्ने को भने संदेश प्रभाह गरे को छ

यसमा तपाइको मत

सम्बन्धित समाचार
धेरै पढिएको
ट्वीटरमा