बुधबार, २८ कार्तिक, २०७५ Wednesday, 14 November, 2018

पिपिएल : पोखरा र चितवन फाइनलमा भिड्ने

चितवनले हुलास काठमाडौं रोयल्सलाई छ विकेटले पराजित गरेसँगै पोखराले उपाधि भिडन्तमा चितवनलाई प्रतिष्पर्धी पाएको हो । 

कास्की, १८ कात्तिक । पोखरा प्रिमियर लिग (पिपिएल) क्रिकेट प्रतियोगिताको फाइनल खेल पोखरा पल्टन र चितवन राइनोजका बीचमा हुने भएको छ । 

आज यहाँ भएको इलिमिनेटर खेलमा चितवनले हुलास काठमाडौं रोयल्सलाई छ विकेटले पराजित गरेसँगै पोखराले उपाधि भिडन्तमा चितवनलाई प्रतिष्पर्धी पाएको हो । 

क्विन्स इभेन्ट म्यानेजमेन्ट प्रालिको आयोजनामा कात्तिक ९ गतेदेखि पोखरा रङ्गशालामा जारी सर्वाधिक पुरस्कार राशि भएको प्रतियोगितामा घरेलु टोली पोखराले भने यसअघिनै समूह चरणमा शीर्ष स्थानमा रहँदै मङ्गलबार हुने फाइनल खेलमा स्थान सुरक्षित गरेको थियो । 

फाइनल प्रवेशको लागि ९५ रनको सामान्य लक्ष्य पाएको चितवनले स्मित पटेलको ३८ र हरिशङ्कर शाहको २६ रनको मद्दतले १८ ओभरकोे दोस्रो बलमा लक्ष्य पूरा गरेको थियो ।

चितवनका आरिफ शेख नटआउट रहँदै ३२ बलमा २० रन जोडे । बलिङतर्फ काठमाडौंका सुसन भारीले तीन विकेट लिएका थिए । टस जितेर पहिला ब्याटिङ रोजेको काठमाडौंले निर्धारित २० ओभरमा तीन बल बाँकी छँदै ९४ रनमा अलआउट हुन पुग्यो । 

खेलमा कमजोर सुरुआत गरेको काठमाडौंका लागि ज्ञानेन्द्र मल्लले ३० र जयकिशन कोल्सावालले २५ रन बनाउनबाहेक अन्य ब्याट्म्यानले दोहोरो अङ्कको रन जोड्न सकेनन् । 

चार ओभर बलिङ गरेका सन्नी पटेलले तीन विकेट लिँदै जम्मा नौ रन खर्चेर काठमाडौंलाई सस्तैमा रोक्न सफल भएका थिए । स्मित पटेल र भुवन कार्कीले समान दुई विकेट र पारस खड्का र करण केसीले समान एक÷एक विकेट लिएका थिए । प्रतियोगिताको विजेताले नगद रु २७ लाख तथा उपविजेताले रु १० लाख पुरस्कार पाउने छन् । रासस

प्राप्त प्रतिकृयाहरू

यसमा तपाइको मत

सम्बन्धित समाचार
धेरै पढिएको
ट्वीटरमा