बिहीबार, १२ असार, २०७६ Thursday, 27 June, 2019

फुटपाथका पसल हटाइए

लगनखेलदेखि मङ्गलबजारसम्मका फुटपाथका पसल आजबाट हटाइएका छन् ।
फाइल फोटो / वेब

ललितपुर । लगनखेलदेखि मङ्गलबजारसम्मका फुटपाथका पसल आजबाट हटाइएका छन् । सडक यात्रा गर्ने यात्रुलगायत पर्यटकलाई आवतजावतमा निकै समस्या परेपछि उक्त पसल हटाइएका हुन् । 

सडकमा करीब १५० बढी व्यापारी व्यापार गरेर बस्ने गर्थे । आकस्मिक घटना परेका समयमा तत्काल एम्बुलेन्स, दमकललगायत पर्यटकको सवारी साधन सहजरूपमा आवतजावत गराउन अप्ठ्यारो परेकाले पसल हटाइएको ललितपुर महानगरपालिकाका मिडिया संयोजक माधवप्रसाद घिमिरले बताए । 

“पसल हटाउने निर्णय महानगरपालिका, त्यहाँका टोलवासी र टोलसुधार समितिले सधैँको लागि लिएका छन्”, घिमिरले भने, “ट्राफिक प्रहरीले महानगरपालिकाको निर्णयलाई समन्वय गरी पसल हटाउन सहयोग गरिरहेका छन् ।” 

सार्वजनिक स्थानमा यस्ता पसल नराख्ने तर यात्रा गर्ने सडकमा मात्र राख्ने क्रम बढेसँगै यस्तो निर्णय गर्न बाध्य भएको महानगरपालिमा–१२ का अध्यक्ष नारायणलाल अवालेले जानकारी दिए । “यात्रा गर्ने मुख्य सडकमा जताततै पसल थाप्नाले दैनिक यात्रा गर्ने यात्रु र पर्यटकको आवागमनमा नकारात्मक असर परेको पाईयो”, अवालेले भने, “मुख्य सडक जताततै सवारी साधन राखिएको पाइएमा त्यसलाई पनि कारवाही गरिने निर्णय गरिएको छ ।” 

उक्त निर्णय हुनुअघि लगनखेलको फुटपाथमा बेलुका दुई घण्टा फुटपाथ व्यापारीलाई व्यापार गर्न दिइएको थियो तर, अबदेखि कुनै पनि समय सडक पेटी र पसल बाहेकका स्थानमा फुटपाथ व्यापारीले पसल राखी व्यापार गर्न नपाउने भएका छन् । रासस

प्राप्त प्रतिकृयाहरू

यसमा तपाइको मत

सम्बन्धित समाचार
धेरै पढिएको
ट्वीटरमा